Heimsbyggðin fylgdist skelfingu lostin með fréttum af flugslysi á Indlandi í síðustu viku þar sem tæplega 300 manns fórust. Einn farþegi lifði slysið af. Hann sat í sæti 11A. En vísindamenn segja að það sæti veiti ekki mestu möguleikana á að lifa flugslys af.

Margir telja því eflaust að sæti 11A sé það sæti sem veiti mestu líkurnar á að lifa flugslys af. En svo er ekki að sögn vísindamanna sem hafa kafað ofan í tölfræði tengda flugslysum.

Daily Star segir að vísindamenn segi að margir þættir komi við sögu þegar kemur að líkunum á að lifa flugslys af. Þar á meðal hvaða flugvélategund er um að ræða og hvernig slys. Rannsóknir hafa leitt í ljós að öruggasta sætið í flugvélinni getur aukið líkurnar á að lifa slys af en það sé samt sem áður sjaldgæft að fólk geti gengið lítt slasað frá borði eftir slys.

Rannsóknir hafa einnig leitt í ljós að það séu 40% meiri líkur á að lifa flugslys af ef setið er eins nálægt stéli vélarinnar og hægt er.

Greining á gögnum um flugslys í Bandaríkjunum frá 1971 til 2007 leiddi í ljós að lífslíkurnar fyrir þá sem sátu í 15% fremstu sætunum voru 49%. Fyrir þá sem sátu í miðjunni, við vængina, voru lífslíkurnar 56%. Fyrir þá sem sátu aftan við vængina voru lífslíkurnar 69%.

Í greiningu, sem Time birti 2015, kom fram að dánartíðnin væri lægst hjá þeim farþegum sem sátu í miðjusætum aftast í vélinni. Var dánartíðnin 28% hjá þeim sem sátu í þessum sætum.