Einn heitasti framherji heims í dag Victor Osimhen beið lengi eftir því að fá mynd af sjálfum sér ásamt Cristiano Ronaldo árið 2021.

Þetta hefur Osimhen staðfest en hann spilaði með Napoli á Ítalíu er Ronaldo var leikmaður Juventus.

Osimhen er orðaður við stærstu félög heims nánast vikulega en hann var og er gríðarlega mikill aðdáandi Ronaldo sem spilar í dag í Al-Nassr í Sádi Arabíu.

,,Ég sagði við hann: ‘Cris, ég væri til í að fá mynd með þér.’ – Hann svaraði: ‘Já hittu mig í búningsklefanum,’ sagði Osimhen.

,,Gianluigi Buffon sá mig og kom til mín, hann spurði mig hvað ég vildi. Hann sagði mér að Ronaldo væri í ræktinni og að ég gæti fengið mér sæti með honum. Við ræddum saman í um 30 mínútur en Ronaldo var ekki mættur, hann var enn að vinna í sér.“

,,Á endanum mætti hann í klefann og hrósaði mínum leik og sagði mér að halda áfram. Hann er í lok dags með frábæran persónuleika.“